Poslovne vesti - Makedonija

Се бараат работници за фабриките на Џонсон Мети, Амфенол и Кемет

Во три фабрики во Македонија е отворен оглас за работници. Американската компанија "Амфенол" која неодамна почна со производство во некогашните погони на Атом" во Кочани распиша оглас за 70 работници.

Во огласот се наведува дека се бара тим-лидер за процесот на производство. Компанијата е светски лидер во производството на интерконекциски производи наменети за автомобилската индустрија, но и за железница, комуникациска опрема за мобилна телефонија, аеронаутика, електроника и индустриски апликации. Во плановите за годинава стои дека во компанијата ќе вработи околу 300 лица.

"Кемет електроникс" и Џонсон Мети", фабриките кои се наоѓаат во економската зона Бунарџик, крај Скопје исто така имаат огласи за вработување.

Нови 6.000 работни места се очекува да бидат отворени годинава во фабриките на странските инвеститори во индустриските зони во Македонија.Вицепремиерот и министер за финансии Зоран Ставрески денеска истакна дека Владата и натаму ќе продолжи со бизнис заедницата и инвеститорите да гради еден добар амбиент за да се зголемува бројот на инвестиции и да се зголемува бројот на вработени.

- Од ден на ден се зголемува бројот на огласи со коишто се отвораат нови работни места од страна на инвеститорите. Деновиве имаме огласи за нови работни места во Кочани во Анфенол", потоа во Штип во Џонсон Контролс" и во многу други делови во -Македонија. Ќе продолжиме со бизнис-заедницата и инвеститорите да градиме еден добар амбиент да се зголемува бројот на инвестиции, да се зголемува бројот на вработени во Македонија кои со последните податоци го достигна историски највисокото ниво од 683.000 вработени во Македонија, највисоко ниво во овие 20 години, како и невработеноста да опаѓа. Последните статистички податоци се 273.000 невработени, што е најниско ниво на невработеност, односно стапка од 28,7 проценти, изјави вицепремиерот Ставрески.

- Тој очекува дека овие добри економски политики, а посебно во делот на привлекување на странски инвестиции, но и реализација на капитални проекти и со подобрувањето на инфраструктурата, изградбата на новите автопати, пругата кон Бугарија, субвенциите во земјоделството да креираат нови можности за нови инвестиции и за нови работни места.

Истакнувајќи дека преку реформите за подобрување на бизнис климата за инвестирање во земјата се гледаат и ефектите, рече дека постоечките капацитети веќе креираа околу 5.000 работни места и оти се очекуваат во текот на оваа нови 6.000 работни места.

Прашан колку е значајно намалувањето на невработеноста со вложувањето на странските инвеститори, Ставрески рече дека всушност преку реформите за подобрување на бизнис-климата за инвестирање во Македонија се гледаат и ефектите.

- Тоа покажува дека станува збор за еден сериозен процес, за еден сериозен придонес кон намалувањето на невработеноста. Очекувам дека со дополнителните политики и со обезбедување на евтини кредити за домашните инвеститори и одржување на нула стапка на данок на добивка ќе се зголемат и домашните инвестиции, а кон тоа ќе придонесе и стабилизирањето на европската економија и сето тоа заедно би требало да ни овозможи да продолжиме со добриот тренд на намалување на невработеноста, изјави вицепремиерот и министер за финансии Зоран Ставрески.